مســــــــــــــــــــــــــــاء الفـــــــــــــــــــــــــــل يا شباب ............كيف الحال؟
حبيبتي ماليكا والله انا مش نسياكي خالص بس انا قلت اخلي الرد علي موضوعك في رواقه كد عشان احاول اني افيدك لان الانترنت مليان وصفات لكن انا لا اثق غير في الي اعرفه او مجرباه انا او حد قريب مني عشان كده لما اجي انصح حد مبحبش افتي
وبما اني اصلا دلوقتي بعمل دايت فأنا حسيت ان احنا ممكن نشجع بعض والعامل المعنوي ده مهم جدا لنجاح اي دايت بصي يا سكر
اولا : الدايت بيختلف من شخص لشخص اوبمعني اوضح من جسم لجسم يعني مثلا الطويله تحرق اسرع شويه من القصيره والنشيطه تحرق اكثر من الكسوله والي فوق ال 40 تحرق اسرع من الي تحت ال40 سنه والي بتشتغل تحرق اكتر من ربه المنزل .........الخ
وده حتي لو اسلوب الاكل متقارب عشان كده قبل بدايه اي دايت لازم نحدد طولنا ووزننا وبناء عليه نعرف احنا محتاجين نخس قد ايه
طبعا كلنا عارفين الايض او الحرق وهو الي بيخرج الاكل الي بناكلوا في صوره طاقه وعشان كده اذا زاد الاكل الداخل للجسم عن الطاقه المستهلكه يبدأ الجسم يخزن الفائض في صوره دهون داخل الجسم وده الي بيسبب السمنه طيب خلاصه الرغي ده كلوا ايه يا ستي .......
يا نقفل الحنفيه يا نفتح البلاعه
يعني يا نقلل الاكل يا نزود الحرق
نبأ بالاولي (نقلل الاكل) في موضوع الاكل او الحميه الغذائيه المناسبه للدايت مدارس كتير جدا ومسميات اكتر هلخصهالك في نقتتين
1_ ياتعملي دايت قاسي وتفقدي وزنك بسرعه بس في نفس الوقت تفقدي صحه وفيتامينات ونضاره والاسؤ انك هترجعي تزيدي بسرعه او
2_تعملي دايت صحي تخسي ببطء وتزودي نضارتك وحيويتك وفي نفس الوقت صعب جدا انك تزيدي
الخيار ليكي طبعا بس صاحب العقل يميز اكيد هنختار الطريقه التانيه...................صح
طب ياعني ايه دايت صحي يعني جسمي يدخلوا كل انواع الاكل الي محتاجها بدون حرمان ولكن بنسب محدده
الفطار
1/4 رغيف عيش بلدي او1/2 لو الرغيف صغير اوي ولو مفيش عيش بلدي متاح يبقي عيش اسمر ريتش بيك 1/2 رغيف
1 بيضه مسلوقه او 2 شريحه جبنه شيدر او رومي او 2 مثلث نستو او 3 معالق فول بزيت وكمون وملح (حاجه واحده)
اي ثمره فاكهه ماعدا (البلح والمانجو والتين والعنب ) او خيار وطماطم
الغداء
اي نوع خضار موجود في البيت (عودي نفسك تطبخي بزيت نباتي وكميه بسيطه)مش لازم يبق ي سوتيه
1/2 رغيف عيش او 4 ملا عق ارز او 8 ملاعق مكرونه (بصلصه متسبكه عادي بس مش بشاميل )
طب لو في محشي يبقي 11 صباع (كرنب او ورق عنب) ا و 6 اصابع متوسطه ( لو بازنجان او كوسه او فلفل)
لو لسان عصفور يبقي 2 بوله متوسطه الحجم (2 كبشه)
اي نوع لحوم بدون دهون يعني 1/4 فرخه مشويه او مسلوقه ومحمره في الفرن بدون زيت(اوعي تكلي الجلد)
او 2 قطعه لحم حمراء مسلوقه او مشويه
او 2 سمكه مشويه او مطهوه علي البخار (يفضل انواع السمك المبططه في الشكل لأنها اقل في الدهون)
او 4 صباع كفته مشويه
او علبه تونا كبيره مصفاه من الزيت
او 3 شريحه كبده جريل
او 1قطعه جبن قريش كبيره
او 2بييضه كبيره
العشاء
2كوب زبادي لايت وسمرتين فاكهه
او 1/4 رغيف وقطعه جبن قريش وخيار
او طبق فروت سلاط كبير
_________________________________________________________________
نصائح هامه جدا جدا
__________
1_ شرب كوب من النسكافيه بلبن خالي الدسم او شاي بلبن او قهوه بلبن او اي نوع منهم ساده (لو مش بتحبي اللبن خالي الدسم يبقي نصف الكوبايه بس لبن والباقي شاي او قهوه او نسكافيه وده قبل الفطار هيعلي مودك ويديكي بور ويحسسك بالشبع شويه
2_بعد الفطار بساعتين ثمرتين فاكهه وبعد الغداء بساعتين ثمرتين فاكهه
3_لما تقعدي علي الغداء تعملي طبق سلاطه حلو كده وتبدأي بيه وبعدين كملي اكلك
4_في الغداء انتي بتختاري نوع خضار ونوع بروتين واي نوع نشويات من المكتوبين لو حسيتي انك جعانه وعايزه تزودي ممكن تزودي في الخضار او البروتين فقط(يعني حتت لحمه او ربع فرخه زياده مثلا)
5_اشربي ميه علي قد ماتقدري 6_8 كوب يوميا بتعلي الحرق وتساعد علي الشبع
6_لازم اي حركه يعني شويه تمارين ايروبكس خفيفه او مشي 1/2 ساعه او رقص 1/2 ساعه ابدأي واحده واحده وبعدين هتلاقي الموضوع سهل وممتع (زياده الايض)
7_الصقي صوره قديمه ليكي وانتي مزه علي الثلاجه عشان كل ما تيجي تكلي تفكرك بهدفك
8_دايما تخيلي نفسك لما هتخسي وانك قد ايه هتبقي حلوه وجذابه خصوصا لما تحسي انك مش قادره تسيطري علي الشهيه
9_اوعي تحرمي جسمك اوي من الاكل الجسم كل ما تحرميه كل مايخزن اكتر
10_ابعدي كل البعد عن الضغوط النفسيه والزعل والتوتر لان اغلب الناس جسمها بيخزن بسبب الحاله النفسيه السيئه
11_اوزني نفسك كل 15 يوم او قيسي قياسك بالمزوره
12_طلعي اكثر لبس شيك عندك في الدولاب من اللبس اللي مبقاش يدخل وعلقيه علي الشماعه قدامك عشان كل ما تشوفيه تتشجعي
13_اشربي 3 اكواب شاي اخضر (صيني اي نوع بيبقي مبروم وسيبك من ليبتون والكلام الفارغ ده)وممكن تحطي عليه نعناع اخضر وطبعا السكر دايت اي نوع سكر فاكهه هيبقي امن بأذن الله والشاي الاخضر فوائده علي البشره وفي الدايت ووقاء من امراض الكانسر عايزه مقاله لوحدها
14_بالنسبه للادويه المساعده علي الدايت ممكن اورلي ستات في حاله لو بوظتي الدايت او كلتي اكله دسمه او معزومه بره او هتكلي في ااشارع او نفسك في اكله معينه بس ده يا مليكا مش علي الفاضي والمليان يعني بالكتير مره واحده متتكررش في الاسبوع عشان مجرد احساسك بأنك محرومه ده بيخليكي تسيبي الدايت بسرعه لكن خليكي عارفه انك لو اتزنقتي في حل (اورلي ستات موصوفي تحت اشراف الدكتوره الي بتابع معاها ماتخافيش مش من دماغي)
13_ اولا وليس اخيرا ابتغي وجه الله (قولي لنفسك انا عايزه اخس عشان احافظ علي صحتي الي ربنا امرني اني احافظ عليها وعايزه اخس عشان ارضي زوجي الي ربنا امرني اني ارضيه)ولو في اسباب تانيه حطيها هدف واضح قدامك
**********************************************************
يارب اكون قدرت افيدك توكلي علي الله وابدأي الدايت بنظام وثقه واكتبي خطواطك علي ورق وعلقيه في البيت وفي المطبخ وعلي الدولاب اعلني حبي نفسك واعلني الحرب علي السمنه وكل ماتخسي وتحسي بجمال جسمك ونضره وشك هتتشجعي وهتكملي انا بالفعل بعمل دايت دلوقتي وهتابع معاكي وابلغك بالنتائج وانتي كمان ابدئي وقوليلي ايه الاخبار ولو ليكي اي استفسار او عايزه تكلي حاجه معينه قوليلي وانا هأكلهالك بطريقتي اهم حاجه خليكي متأكده انك مش هتتحرمي من حاجه وانا تحت امرك في اي استفسار