السلام عليكن
ازيكن
يارب تكونوا بخير
الواحد وهو قاعد بيفتكر كده اول مرة عمل حاجات كتير .. كان يقعد يضحك .. علشان كده قولت نتشارك في الحجكايات دي
خدو عندكو
اول مرة عملت فيها ملوخيه في شهر العسل وما زالت نقطة ضعفي .. عملت الطشة بالخل والتوم زي الكشري
المهم اني اقنعت زوجي ان احنا سلو عيلتنا كدا واكلها وكان مبسوط جدا
..
..
..
..
اول مرة كان فيه انترنت في التسعينات وهي لحساني من ساعتها كانوا اما اصحابي الاجانب يكلموني ويقولولي هنبعتلك الصور النهارده .. كنت بسيب الجهاز مفتوح
علشان خايفة لو قفلت الكونكشن الصور ماتوصلش على الايميل وانتم عارفين ان لالانترنت ساعتها كانت علىالتليفون ( محدش يقول لابويا )
..
..
..
..
اول مرة حبيت اعلم بنتي تقعد علىالبوتي رحت صيدليه العزبيي في شارع الهرم وقولتها بكل فخر
" الاصريه بكام عندك لو سمحت "
الست جالها شلل مفاجئ وقالت
" نعم "
اعيد تاني علشان في ناس مبيفهموش
" الاصريه بكام لو سمحت "
الست قالتلي يعني ايه
قولتها بعلم
" اللي الاطفال بعملوا فيها ياي "
بصيتلي بقرف كده وقالت
" يا رنا وري الاستاذه البوتي اللي عندنا "
ولا همني اشتريت حاجات تاني وانا خارجة قولتها مش معقول انتم معندكمش اصاري حلوة "
..
..
..
..
اول مرة عملت قهوة لمديري بس دي كانت متعمده .. لغرض في نفس يعقوب
عملت 3 معالق سكر ومعلقة واحده بن .. يعني كانت شربه بالمعنى الاصح وياعيني شربها من غير تعليق لاني بغلستي فضلت واقفة بحد ما خلصها دلوقتي الحمد لله
..
..
..
اول مرة اتفلسفت افتكرت ان الانف بتستنشق الاكسجين بس وتسيب ثاني اكسيد الكربون برة ..
اول مرة صومت كنت فاكرة ان الصيام يعني عدم دخول التويلت برضة
كفايه عليكم كدا