مش عارفه......... انا لسه معدتش ال5 سنوات بس قربت ولكن احيانا اشعر ان زوجي صامت فتره طويله (ساعتين بالكثير)في البدايه كنت اصمت انا الاخري (لماذا لا يبدأ هو بالكلام؟؟؟)
وسيل من الافكار علي غرار(ماهو لسانه شبرين مع الغرب وبقه مفتوح من الودن دي للودن دي بس يجي عندي انا والنكد يحضر طب والله مانا معبراه)هههههههه لا يعني مش للدرجه دي بس احيانا بستغرب ومع ذلك تفرق كتير لو فتحت معاه كلام ورد عادي ولو فتحت معاه كلام ورد من تحت الدرس ,وعلي كل حال الراجل في مرحله الخرس الزوجي دي نادرا لما بيبدأ هو بالكلام دي طبيعه في الراجل مش عشان هو بيتقل ولا حاجه ,وكمان الراجل ممكن يلفت انتباه الست ليه ويستحوز علي انتباهها بسهوله وعلي العكس الست من الصعب انها تستحوز علي انتباه الراجل بسهوله بمعني ان الست ممكن لما تكلم جوزها حتي لو الموضوع مهم يفضل عنيه علي الشئ الي كان شاغله (التلفاز او الكمبيوتر او الجرنال) بس سا معها كويس وبيرد كل حين ومين او يهز رأسه عشان تعرف انه معاها وعلي العكس ممكن لو الزوج وجه كلام للزوجه غالبا بتسيب كل الي في اديها وتبص ناحيته تلقائي وده سبب من الاسباب الي بيخلي الكلام مايطولش بسبب عدم انتباه الزوج الي زوجته جيدا فأكيد بتتضايق ويأما هتنتقده (انتا مبتبصليش ليه وانا بكلمك سيب الزفت الي في ايدك ده وركز معايا) او هتزعل وتبطل كلام(والله لخليك تيجي لحد عندي زي ال........)وده طبعا علي حسب طبيعه الست انا عن نفسي لما بيحصل الموقف ده معايا بعمل نفسي قطعت الحديث عشان اقوم اجيب حاجه وطبعا بقطعه في حته شيقه اوي عشان يفضل مستني يسمع الباقي وساعتها الكوره في ملعبي لأنه لما ارجع مش هتكلم تاني في الموضوع وساعتها هوه هيبقي عنده الفضول انه يسمع وبناء عليه هيبقي وقتها منتبه وكله اذاان صاغيه ,وفي طريقه تانيه بس دي لو الاولي ماجبتش نتيجه وهيه انه اول موضوع هيكلمني فيه بعد ماعمل معايا كده هسمعه بنفس الاسلوب (بدون انتباه)وساعتها هيحس ان الموضوع مستفذ وبالتدريج هيبطله
كمان الافضل ان الست تتعود انها لما تكلم زوجها دايما عنيها في عنيه وتقرب منه قدر المستطاع اثناء الكلام وممكن كمان يدها تبقي علي كتفه او علي وجهه (زي مابنكلم ولادنا الاطفال عشان نلفت انتباههم بنحط ادينا علي راسهم او علي ذقنهم او نمسك اديهم واحنا بنتكلم الرجل زي الطفل في بعض اللحظات والاسلوب ده بيخلي ليكي تأثير عليه)
كمان الصوت الواطي في الكلام بيجبر الي قدامك انه ينتبه
والغموض النسبي ده مهم قوي لان كل ماكان الزوج فاهم مراته قوي مبيبزلش اي مجهود في التعامل معاها (عشان كده في فترات الخطوبه بنحس ان الراجل مهتم قوي بينا)
لازم الست تعمل وقت ليها هيا وزوجها من غير الولاد ان شاله مره واحده في الاسبوع يروحوا مكان يتكلموا فيه مع بعض او يتعشوا او حتي يقعدوا مع بعض في البيت بس بمفردهم بدون الاولاد ودايما الست لازم هيه الي تسمع لزوجها وتسأله عن اخباره وعن شغله وتقوله دايما ( يا حبيبي انتا مضغوط اوي وبتعمل مجهود كبير ولازم تدي لنفسك حق انتا صعبان عليا وانا متضايقه اوي علشانك ونفسي اشيل الحمل عنك حتي لو هيه بتشتغل)الرجل بيحب العطف قوي ويحب الست الي تشعر بقيمته وتحسسه انا بيعمل مجهود محدش غيره يقدر يعمله
دايما لازم الزوج يحس ان احلي واريح لحظاته هيه الي بيقضيها مع زوجته ويحب ياخد رأيها ويحكلها علي تفاصيل يومه وده بيحصل بالخطواط الي فاتت دي وهيه كمان لازم تقوله ان انا مابرتحش غير في الكلام معاك وانتا الوحيد الي بقدر اشكيله همي وانا مليش غيرك في الدنيا
من الاساليب المهمه جدا لتجنب الخرس الزوجي عدم انتقاد الزوج كثير وتوجيه الاتهامات اليه لان ده هيخليه مش عايز يحكيلها اي حاجه وبالتدريج هيبطل يتكلم كتير(بدل ما غلطلي بكلمه ويبقي يومي اسود مش هيعدي)
من الضروري يبقي في خصوصيه للزوجين بعيدا عن الاولاد(يعني نقول اطلعوا بره يا اولاد من فضلكم هتكلم انا وبابا شويه ومش لازم يكون في موضوع مهم او مش لازم يبقي في موضوع من اصله يعني قوليله انا حسيت يا حبيبي انك مرهق فقلت اريحك من وش الولاد شويه وفي الحاله دي لو هوه فعلا مش مستحمل كلام يكفي حضن دافئ او يضع راسه علي كتفك وتفضلوا سكتين انتوا الاثنين وهوه ده كلام القلب بقي وفعلا بيغني عن كلام اللسان
ولما تحبي تتكلمي معاه قوليله انتا شكلك دماغك مشغوله وانا مش عايزه اصدعك ياحبيبي انا هسيبك لوحدك شويه وساعتها يأما هيقولك لأ خليكي وتعالي نتكلم او هيقعد شويه لوحده وبعدين هيجي لحد عندك ويفتح هوه الكلام
يعني خلاصه الرغي ده انه الست هيه الي لازم تحاول تلفت انتباه زوجها وكمان تعرف تحدد امتي زوجها محتاجها تكون صديقه وامتي محتاجها ام وامتي محتاجها زوجه .......الخ
والي مش متعوده علي الاسلوب ده مع زوجها من البدايه تقدر تعمله دلوقتي واحده واحده وبالتدريج وهيبقي شئ متعود عليه مع الوقت
كل الكلام الي فات ده بيحمي الراجل من ازمه منتصف العمر (دي قصه تانيه خالص بس اسؤ بكتير من الخرس الزوجي)
وقبل كل شئ لازم ندعي ربنا اننا نكون قره اعين لازواجنا ويضع المحبه والرحمه في قلوبهم