السلام عليكن
في رحلتنا في الكلام عن تطورات الطفل عمر الثلاث اعوام ..من اهم التطورات دي التطور اللغوي
..
..
..
بعد ما ابننا هيبطل يقول كلمة لأ اللي في بقو على طول .. كمان هيبقى عنده نوع من الثبات النفسي وفهم الذات .. هيضيف لنفسة حاجة جديده وهيضيفلك حاجة جديده
هيضيف لنفسة مكتبه جديده من الكلمات من البيئه اللي حوااليه .. دا معناه انك تحرصي على ان كلامك يبقى مفهوم .. واضح .. لائق .. ويستحسن انك تبدأي تعلميه ايات القرآن الكريم علشان مخارج حروفه تبقى صح ويتعلم اسرع
انا اعرف بعض الامهات بتسجل صوتها على كاسيت بالصور القصيرة ويفضل شغال في البيت علشان الولد اللي يدخل اذنه يبقى كلام ربنا ..
- التأتأه في الكلام في مش قصور لانه دا عبارة عن تجميع كلمات بصورة اسرع من ان العقل يفندها ويحطها في ارفف .. يعني الورق متبعتر على الارض وهو بيدور كتير علشان يلاقي الكلمة المناسبه
علميه المنطق في التفكير والعلاقى بين الاشياء
ماتسيبهوش بيتفرج على حاجة لوحده .. دائما اسألي .. انت شوفت ايه ؟.. يعني ايه دا .. هم بيعملوا كدا ليه .. اخراج الافكار من راسه في حد ذاته فوائده كتير .. حضرتك بتطوري الصياغة اللغويه عنده .. وبتعرفي هو شايف ايه وفاهم ايه من اللي شايفة .. ولو في حاجة تتصحح قوليلوا .. عارف بقى انا شايفة انهم بيعملوا كذا وكذا ..
-لا تعليق على الـتأتأه او التلعثم في الكلام وارجوكي متعجلهوش متسرعيهوش في النطق .. من فضلك بالرااااحة معاه ..
حالولي تكرري جمل بسيطة ومفهومة .. فلان نظيف ومرتب .. فلان بيحافظ على ملابسة وهكذا
..
هيضيف ليكي انت انه هيبقى اكثر توددا ليكي وانصياعا للاوامر .. دا في حالة ايه بقى ..
في حالة اننا مابنتعاملش بالعنف ..نطلب طلبات معقوله .. وفي حالة اننا مش بندلع لدرجة الافساد او نشد لدرجة العنف ..
هيبقى وقت حلو قوي وانت بتسمعي كلمة حاضر ..
انا عن نفسي اول مرة بنتي قالت فيها حاضر اتخضيت وكنت هوقع اللي في ايدي .. تأثيرها رائع ...اتمتعي انت كمان