معلومات هامه عن تساقط الشعر

السلام عليكم ورحمه الله وبركاته
ازيكم يا شبات عاملين ايه يارب تكونوا كلكم بخير

مستكه بتقول ان شعرها بيتساقط ............شوفي يا ست البنات لو شعرك بيتساقط بسيط يعني خف شويه صغيره يبقي ممكن تستخدمي خلطات الزيوت زي ما وصفولك في الرد علي موضوعك وكل الانواع الي زكروها مفيده
اما ازا شعرك بيتساقط بغزره يبقي الدهانات مش هتجيب معاكي نتيجه انا كنت بتابع مع دكتور جلديه بسبب تساقط الشعر والدكتور قالي ان خلطات الزيوت دي بتحسن من الشعر بمستوي بسيط وده علي المدي البعيد لكن افضل شيئ لعلاج الشعر هو المقويات الي عن طريق الفم بتجيب نتيجه اضعاف اضعاف النتيجه الي بتجيبها الدهانات وبناء عليه في نوعين من الكبسولات النوع الاول وده الاقوي اسمه (بانتوجار)
وديه عباره عن بوكس سعره (56)جنيه مصري تقريبا وده بيكفيكي لمده شهر كامل ثلاث مرات يوميا مع الوجبات الثلاثه وبيستخدم لمده ثلاث شهور بحد ادني وممكن نكمل ثلاث شهور كمان عشان نوصل لافضل نتيجه ممكنه بس في الثلاث شهور الثانيه ممكن تقللي الجرعه لحبيتين يوميا وده بيجيب نتيجه هايله بفضل الله وانا جربته وجاب نتيجه ممتازه بس لما اختي جربته حست ان الشعر في جسمها بيطع بسرعه او يمكن لانها مشعره حست بكده لكن انا الحقيقه محستش بأي سرعه في انبات شعر الجسم المهم لما قالت للدكتور كتبلها نوع تاني وده الي انا بقولكم عليه اسمه (هير تون) وده بيشتغل علي بصيلات الشعر في الرأس فقط وجاب معاها نتيجه حلوه اوووي بس (بانتوجار) كان نتيجته افضل المهم ان النوعين ممتازين

نروح بقي لللسيون اسمه (هير بلس فايف)وده بقي بيساعد علي انبات الشعر في بوصيلات الشعر التي توقفت عن العمل وكمان تحسين نوع الشعره المستنبته يعني بتبقي انعم وبتلمع وصحيه وسعره (75)جنيه مصري تقريبا وده بيستخدم عن طريق رشه بالبخاخ المرفق علي جلد الرأس والاستمرار في تدليك الشعر برفق لتنشيط البوصيلات وهوه سائل غير دهني ولا يسبب بقع علي الملابس

اخر معلومه لازم الكورس ده يتعمل يوميا يعني لو توقفتي اسبوع مثلا تبقي ولا كأنك عملتي حاجه وتعيدي من الاول

انا عارفه ان انتوا هتقولوا ايه كل ده بس احنا ياما سمعنا عن خلطات الزيوت واشي زيت حيه واشي زيت حشيش وياما بقعنا اكياس المخدات وكل ده بدون فائده او فايده بسيطه علي المدي البعيد لكن المعلومات دي انا نفزتها وعارفه نتيجتها وكمان المعلومات دي من دكتور كنت بحجز عشان اروح له قبلها باربع شهور عشان الاقي ميعاد وكشفه كان 400 جنيه كمان في نصايح تانيه مهمه اوووي زي نوع الشامبو وصابون الوجه عشان البوتاس الي احنا بنحطه علي وشنا وشعرنا ده هوه الي بيخلينا نعجز بدري بدري

وانا ان شاء الله هرفعلكم اسماء المستحضرات دي وكمان شويه نصايح للشعر والبشره عن طريق الاكل المتناول
المهم يا مستكه لو هتجيبي العلاج يبقي نوع من الكبسولات مع الليسيون في وقت واحد وان شاء الله هيبقي شعرك احسن من الاول

ماشاء الله معلومات حلو قوي يارب يحوق معاها مع ان شعرها كان حلو يا نوشا
بس أنت عارفه برده يقولك حمامات الزيت مره في الاسبوع وناس بتعالج الشعر بس العسل وبيجيب نتائج هايله بس أنا بستحرم بصراحه

والله معلومات قيمه يا نوشا بس أنا أعرف ان الفرق في عمر الشعرايه يعني في شعرايه عمرها أربع شهور ودي هي اللي تنبت بالادوية والدهان ولكن الشعر الأصلي اللي عمره سنتين دا مبيرجعش غير بالعلاج الطويل المدى اللي بيوصل لشهور طويله أنا الدكتور بتاعتي قالتلي كدا

بس كدا مش عدل على فكره لأنك رديت على مستكه وأنا ﻻ

معلومات رائعه يا نوشا زي ماهو متوقع منك طبعا
وبالنسبة للدواء دا أنا هجربه ان شاء الله واقولكم النتيجه
شكرا يا نوشا

العفو يا قمرات انا عنيا ليكم

شكرا يانوشا موضوع رائع قوليلي الفرق بين الدويين أيه حسب البشره يعني

بصي يا ستي هو الي انا عرفته من الدكتور وقتها ان (بانتوجار)بيشتغل علي بوصيلات الشعر في الجسم كله لكن (هير تون )بيشتغل علي بصيلات الشعر في الرأس فقط وعشان كده مفعوله ابطأ انما بالنسبه لظهور الشعر في الجسم فالناس المشعره بتحس بيه اكتر شويه من الي مش مشعره وده الي انا اكتشفته لما انا واختي وصحبتي استخدمناه كان ليه تأثير مختلف علي كل واحده فينا

بس متهالي ان مش لازم الاعتماد بس على التابلتس يعني ﻻرم برده ريوت وحمامات كريم وﻻ ايه

اذا عايزه تساعدي العمليه شويه استعملي شامبو(فولتن)هو مستورد بس متحطيش اي بلسم او حمامات كريم لانها كلها فيها مواد كيماويه ماعدا نوعيات قليله اوي ودي بتبقي باهظه الثمن وبناء عليه الدكتور كان مانعني من البلاسم وحمامات الكريم ولو شعرك جاف اوي وعايزه تحطي يبقي علي الاطراف بس وعلي فكره الدواء لوحده جاب نتيجه هايله معايا من غير اي حاجه لان الليسيون ده افيد من اي حمامات كريم

أنا على فكره بنت جارت حياتي في مصر لسه بحكي معاها في الموضوع قالتلي ان بنت جارتها جربت اللوسيون ده وبتقول نتيجته روعه

ازيك يا نوشا شكرا على انك عملتيلي الموضوع ده بس انا بخده بقالي اسبوع 3 مرات في اليوم وبعدين لقيت شعر يكتر في صدري وبطني وحوالين بقى ايه رايك

بصي يا مستكه انا اتكلمت في النقطه دي من البدايه وقلت ان في بعض الناس حصل معاهم كده بعضهم فضلوا يكملوا الكورس ويعملوا ازاله لشعر الوجه والجسم الزائد بأستمرار والبعض الاخر(زي اختي) طلبت من الدكتور نوع تاني من العلاج وكان اسمه (هير تون) وده مابيعملش اي تأثير سوي علي شعر الرأس فقط وطبعا زي ما قلتلك الخيار ليكي اذا زياده الشعر دي مضيقاكي ممكنن تغير للهير تون

قوليلي يا مستكه انتي بنت ولا متزوجه

معلومه : بعد انتهاء الكورس لا يستمر الشعر الزائد في النمو

والله ربنا يطمنك يا حبيبتي يعني انت قصدك ان بعد ما اشيل الشعر السويت مش هيطلع بداله كتير كده ؟

وها دا ما بيقصرش على الهرمونات ولا ايه

طيب معلش سؤال تاني

هو بعد مابيخلص الكورس مش هيخف الشعر تاني بعد فتره معلش بتقل عليكي

انا على فكره متجوزه الحمد لله

بصي يا حبيبتي بالنسبه لشعر الجسم الي زاد بسبب الدواء ده بعد الكورس مش هيطلع بالطريقه دي تاني
اما بالنسبه لشعر الرأس
انتي المفروض بتعالجي شعرك من عوامل اثت عليه وخلته يقع ودي اسبابها كتير ومعني كده لو بعد العلاج عرضتي شعرك العوامل دي مره تانيه ممكن يقع بالتدريج تاني وده الي انا بتكلم فيه انك لازم تغيري كل انواع الشامبوهات والمستحضرات الي بتستعمليها لشعرك لو عايزه تحافظي عليه بعد العلاج وكمان نظامك الغذائي واحوالك النفسيه وكل العوامل المؤثره عل يالشعر يعني علاج الشعر زي العلاج من السمنه ممكن يرجع تاني بس ده في حالات نادره

طيب يعني ايه نغير الشامبوهات امالنغسل شعرنا بايه

والله يا جماعه مفيش احسن من الزيوت الطبيعيه

اكيد يا شعنونا انا قصدي نغير (نوع) الشامبوهات الي بنستخدمها مش نبطل نغسل شعرنا!
وانا ذكرت فوق في الردود اسم نوع من انواع الشامبوهات الي ممكن نستخدمها ومتضرش الشعر
زي شامبو (فولتن)

ودا سعره قد ايه وﻻقيه في السعوديه

مش عارفه بس يابنتي السعوديه فيها حاجات احسن من مصر بكتير هوه سعره 93 جنيه مصري تقريبا بس بيقعد معاكي فتره طويله

سعودية ايه ومصر ايه يا بنتي الشعر دا خلقه يعني في واحده معلش معفنه ماشيه في الشارع وشعرها احلى من نانسي وواحده تصرف على شعرها كنوز وبرده شعرها وحش